लघुकथा (अङ्क २२ मा प्रकाशित)

"तपाईं समय अगावै मर्दै हुनुहुन्छ ! तपाईं खरानी बन्दै हुनुहुन्छ !’’

उसले हेर्‍यो !

टेलिभिजनमा धुमपान बिरूद्ध ठाडो विज्ञापन आइरहेको थियो ।

उसलाई पनि थाहा थियो ऊ सकिंदैछ, किनकी उसका मुखमा लाखौँ चुरोटका ठुटा पसिसकेका थिए । ऊ जीर्ण भैसकेको थियो ।

चुरोटकै क्यान्सरले उसको पितालाई पनि खर्लप्प निलेको थियो ।

ऊ बारम्बार अब चुरोट खान्न भन्थ्यो, तर चुरोट उसको जीवन मरणको साथी बनिसकेको थियो ।

ऊ जुरूक्क उठ्यो, चुरोटको बट्टा समात्यो ।

बट्टामा छापिएको क्यान्सर लागेको डरलाग्दो तस्वीर हेर्‍यो ।

बट्टाबाट एउटा चुरोट निकाल्यो, ओल्टाई पल्टाई हेर्‍यो । मन थाम्न सकेन ।

उसले चुरोट सल्कायो, लामो सर्को तान्यो र हावामा धुवाँ उडायो । कोठाभरी रूमलिएको धुवाँमा उसले आफ्नो सपना खोज्यो ।

..............................................................................‍

..‍.‍.‍साथ सहयोगको खाँचो

लघुकथा संसार र कविता संसार अनलाइन मासिक पत्रिकालाई
जीवित राख्नका लागि तपाईंको 
आर्थिक सहयोग महत्वपूर्ण हुन्छ ।