उसलाई निक्कै छटपटी भएको छ !
वृद्ध बा आत्तिए ! “बाबु ! ए बाबु !! के भयो ?’’
उस्ले लामोलामो सास फेरिरहेको थियो । दुईहात पाखुरा कसेर बलले उचाल्न खोज्दै थियो । उसले दाह्रा किटिरहेको थियो । केही भन्न खोज्दै थियो तर बोली थिएन ।
बाले मुख सुकेको देखेर चम्चाले मुखमा पानी राखिदिनु भयो । दाँत बेस्सरी बाँधिएको भएर मुखबाट पनि बगेर बाहिर आयो ।
ऊ नबोलेको दुईदिन भैसकेको थियो । बेलाबेलामा उस्ले खाली यस्तै हर्कत देखाउँथ्यो ।
बाले उस्लाई गाह्रो भएको देखेर अक्सिजन थोरै बढाउनु भयो । मुखमा लगाएको अक्सिजन मास्क सिधा बनाउनुभयो । पीडामा कुनै कमी देखिएन । ऊ केही बोल्न खोजिरहेको थियो ।
डाक्टरले उस्को छातीमा लागेको गोलीको भ्वाङ् पुरिन मुस्किल छ भनेका थिए । बाले आत्तिएर नर्स बोलाए ।
नर्सले दुखाई कम हुने सुई लगाई दिइन् तर न सविनको दुखाई कम भयो न त बा को !
यसपटक सविनले अक्सिजन मास्क थुतेर फाल्यो अनि बेस्सरी करायो, ऐया ! मरेँ !“ छोराको बोली फर्केको सुनेर बा खुसी भए । छोरालाई सुम्सुम्याउन पुगे । तर छोराको अनुहारमा चिटचट पसिना थियो । शरीर थरथर काँपेको थियो ।
नर्स आत्तिइन् ! बाले चारैतिर अन्धकार देखे !
बाले अकस्मात छोरालाई रुँदै सोधे, “बाबु ! तेरो अन्तिम इच्छा के छ ?’’
छोराले ओठ थर्थराउँदै लामो सास तान्दै बल्लतल्ल आवाज निकाले, “बा… म… यो देशमा उज्यालो भएको हेर्न चाहन्छु !’’
अन्तिम वाक्यसँगै छोराले जिउ तनक्क तन्कायो ! बा चिच्याए ! नर्स डाक्टर बोलाउन गइन् । बाले भावुक हुँदै छोराको शवलाई छोएर कसम खाए, “बाबु अब तेरो अन्तिम इच्छा, अब तेरो यो बुढो बाउको अन्तिम इच्छा हुनेछ !’’
जीवित राख्नका लागि तपाईंको
आर्थिक सहयोग महत्वपूर्ण हुन्छ ।
No comments:
Post a Comment