**********************
स्याङ्जा जिल्लाको आँधीखोला गाउँपालिका -६ फापरथुममा माता नन्दकला, पिता पं. आनन्दमणि ढकालको सुपुत्रकारुपमा त्रिलोचन ढकालको जन्म वि.सं. २००६ श्रावण १८ गते भएको हो । फापरथुका उकाली ओराली र भञ्ज्याङ देउरालीमा बाल्यकाल बिताउनु भएका ढकालले त्यही सेरोफेरोकै प्रद्युम्न पनेरु, जनप्रदीप र त्रिशहीद माध्यमिक विद्यालयहरूबाट विद्यालयस्तरको तथा अमृत साइन्स कलेज, पृथ्वीनारायण कलेज, त्रिभुवन विश्वविद्यालयबाट उच्च शिक्षा आर्जन गर्नु भएको छ ।
**********************
रक्षा
-त्रिलोचन ढकाल
फापरथुम, स्याङ्जा
सिंहले गाउँ सखाप पारेको थियो ।
किसानमा आक्रोश जागृत हुनु स्वाभाविक थियो । उनीहरु बोल्न थाले– “सबभन्दा पहिला गाउँमा कुकुर भुक्न छोडेका थिए ।”
”अनि भेंडा र बाख्राहरु आहारा बने । खोरहरु सबै रित्तिएका छन् ।”
“फाट्टफुट्ट भएका गोरुहरु पनि समाप्त भए ।”
“मेरा त बिराला र कुखुरा समेत कराउन छोडे ।”
“भैँसी त छन् भनेर चित्त बुझाएको थिएँ । ती माथि पनि चट्टानी पञ्जा बर्सिन थाले ।”
आक्रोशले कब्जा गरेको थियो जनमन । बन्दुकहरुले काँधमा स्थान ग्रहण गरेको देखियो ।
त्यही समयमा सुट, बुट र टाई लगाएका शिक्षितजस्ता देखिने मानिसको प्रवेश भयो । उनले भने–
“ए ! पख पख !! सिंहले बाँदरबाट तिम्रो रक्षा गरेको छ ।”
