लघुकथा (अङ्क ११ मा प्रकाशित)

 एकल महिला

- देवकी के.सी.
दक्षिणकाली नगरपालिका ३, काठमाडौँ    

लौन सन्ते दाई मेरो बुढोलाई बिहानदेखि पखाला लागेर मर्न आँटिसके । बिहान त्यो पोइटोक्वाइ अलच्छिना गंगा मेरो घरमा एक गिलास दुध माग्न आएकी थिइ । तयसै बेलादेखि मेरो बुढोलाई पखाला चल्यो । पक्कै त्यो गंगाको नजर लागेर हो । पोइटोक्वाई, बोक्सी लोग्ने विदेश गएको महिना दिनमै बाकसमा फर्कियो । अब मेरो लोग्ने पनि खान ठिक्क परेकी । तपाईंले झारफुक गरिदिनु हुन्छ कि भनेर बोलाउन आएकी सन्ते दाई चमेली गंगालाई गाली गर्दै सन्तेको घरमा पुगिन् । 

एक महिना अघि मात्र क्यान्सरले स्वास्नी मरेर एक्लो बनेको सन्ते झारफुक गर्न भनेर चमेलीको घर आयो । एक गिलास नुन चिनी, पानी हातमा लिएर नबुझिने गरी खोइ के के दुई चार अक्षर फलाक्दै गिलासको पानीमा मुखले फुफु गर्दै फुक्यो । त्यसपछि चमेलीको लोग्नेलाई पिउन दियो । उसको पखाला कम हुँदै गयो । चमेलीले सन्तेलाई निकै धन्यवाद दिइन् । 

फेरि लोग्ने बिरामी पारिदिएको भन्दै गंगाको सत्तोसराप गर्न थालिन् चमेलीले । गंगा चमेलीको घरमा दुध माग्न जानु र चमेलीको लोग्नेलाई पखाला लाग्नु संयोग मात्र थियो । वास्तवमा सन्तेले दुइचार अक्षर फलाक्दैमा चमेलीको लोग्नेको पखाला रोकिएको पनि होइन । त्यो त नुन चिनी र पानीको कारण रोकिएको हो । 

अचम्म त के भने एउटी महिलाले अर्को महिलालाई पोइटोक्वाई, अलच्छिना, बोक्सी भनेर गाली गरिन् । लोग्ने मरेको गंगाले चमेलीको घर टेक्दा पोइटोक्वाई र बोक्सीजस्ता घिनलाग्दा अपशब्द प्रहार भए उनीमाथि । तर त्यो स्वास्नी मरेको सन्तेचाहिँ किन स्वास्नीटोक्वा र बोक्सा भएन होला चमेलीको नजरमा ? एकल महिलालाई घिनलाग्दो दृष्टिकोणले हेर्ने हाम्रो समाजमा स्वास्नी मरेका पुरुषचाहिँ किन अपहेलनाको शिकार नबनेका होलान् ?

....साथ सहयोगको खाँचो