लघुकथा (अङ्क १८ मा प्रकाशित)

राम्रो मान्छे

- विनोद नेपाल
पोखराथोक, माडी, पाल्पा 

निर्वाचन घोषणा भएदेखि नै उनी अलमलमा थिए । जस्लाई मत दिए पनि उस्तै, यतिका पटक मत दिइयो, जस्लाई दिएपनि उही चाल त रैछ आखिर !

उनी यसपटक फेरि उसैगरी घाम खाएर, लाम लागेर मतदान गर्न नजाने टुङ्गोमा पुग्नै आँटेका थिए साथीले फोन गर्‍यो, 'कतिखेर जाने त मतदान गर्न ? सँगसँगै जाउँला है, मलाई छाडेर नजानू ।’

'छोड् यार, म त यस्पालि दिन्न' उनले भने ।

'किन र ?' - साथीले प्रश्न गर्‍यो ।

उनले भने 'यतिका पटक दिएको के काम लाग्यो र ?, हिसाब गर्‍यो भने शून्य नतिजा, यसैले फेरि पनि के मत खेर फाल्नु बिनसित्ती'

'खेर त नदिँदा पनि त गयो नि हैन र ? त्यसैले जाउँ  मत दिनुपर्छ, राम्रो मान्छे हेरेर दिनुपर्छ नि मत जस्तो कुरा हाम्रोलाई होइन' -साथीले भन्यो ।

उनलाई कुरो हो जस्तै लाग्यो  ।

'ल आउ त सँगै जाउँ, बरु ढिलो नगरौँ' -उनले भने ।

साथी एकैछिनमा आइपुग्यो ।

उनीहरू मतदान केन्द्रमा पुगे । 

मतपत्र हातमा परेपछि उनी वरपर, आफ्ना अघिपछिका मानिसहरू तर्फ आँखा दौडाउन थाले ।

उनी अलमलिइरहेकै थिए, साथी मतदान गरेर फर्कियो । सोध्यो "किन त ? अझैसम्म मतदान गरेका रहेनछौ त !’ 

उनले भने - 'पख न एकछिन् राम्रो मान्छे खोज्दैछु क्या, कोही भेटियो भने उसैलाई दिएर जाउँला !'

....साथ सहयोगको खाँचो