लघुकथा (अङ्क १८ मा प्रकाशित)

 दृष्टिदोष

- लता के.सी.
तीनकुने, काठमाडौँ -३२ 

"यो आइमाईले टोल नै बिगार्ने भई । सबै मिलेर यसलाई लखेटौँ न !’’ छतमा बसेर बाहिरी दृश्य नियालिरहेकी रमाले बीनातिर औँलो सोझ्याउँदै कराइन् । बीना दुई जना सहकर्मी लिएर घरभित्र छिर्न गेट खोल्दै थिइन् । तत्क्षण नै यता उताका छिमेकी पनि छतमा देखिए । केहीले धारे हात लगाउन पनि भ्याए । 

रमा टोलकै धनीमानी वर्गमा पर्थिन् । घर बसी खाने आइमाई बटुलेर दिनभर गफ हाँक्नु र आफ्नो रवाफ देखाउनु उनको दिनचर्या थियो । बीना सरकारी कार्यालयमा हाकिम थिइन् । उनको उठ्बस पुरूषहरूसँग भएको रमालाई पचेको थिएन । यस्तो घटना पहिलो पटक मात्र भएको थिएन । बारम्बार खप्नु परेको आक्षेपलाई बिनाले सधैँ हाँसेर पचाउँथिन् । 

उनलाई लाग्थ्यो,  "मूर्खसँग मुख लागेर किन आफ्नो मूल्य घटाउनू ?" तर आज उनको संयमता भङ्ग भयो । उनी सिधै रमाको ढोका ढक्ढकाउन पुगिन् । दुबैको तातो रिस पोखियो । वाक् युद्ध चर्कियो । 

रमाले भनिन्,  "हाकिम भएँ भन्दैमा लोग्ने मानिससँग टाँसिंदै हिँड्नु पर्छ ?"

बीनाले चेतावनी दिइन्,  "आइन्दा यस्तो फट्याइ भयो भने मानहानीको मुद्दा हाल्ने छु ।"

रमा के कम ? कराइन्,  "जो चोर उसको ठूलो स्वर !"

रमाका श्रीमान्  टुप्लुक्क घर आइपुगे । उनी बिखलवन्दमा परे । उनले दुबै जनालाई सम्झाए । जेनतेन भनाभन  साम्य भयो ।

फर्किने बेलामा बीनाले उनका श्रीमानसमक्ष अनुरोध गरिन्,  "तपाईंकी यी बिन्दास  श्रीमतीलाई ठेगानमा राख्नु होला ।"

....साथ सहयोगको खाँचो