साभार लघुकथा (अङ्क ३४ मा प्रकाशित)

‘‘के गर्दै छस्, धनु?’’ कुवेतमा रोजगारी गरेर फर्केको भोलाले सोध्यो ।

धनु र भोला सानैदेखिका साथी थिए । सँगै पढेका थिए । भोला पढाइ सकेर बिदेसिएको थियो । धनुभने गाउँमै मिल चलाएर बसेको थियो । धनुले तोरीको घान मेसिनमा हाल्दै गर्विलो व्यङ्ग्य गयो, ‘‘ए ! तँ फर्किस् लाहुरे भएर ?’’

भोलाले दुखेसो पोख्यो, ‘‘लहलहैमा लागें । कमाउन सकिनँ । दुःख मात्रै पाएँ । बरु गाउँमै तोरी पेल्ने मिल राखेर तैंले जितिस् ।’’

‘‘अझै केही बिग्रेको छैन, यार । गाउँलेको सेवा पनि हुने, कमाइ पनि हुने काम गर् ।’’ आफ्नै धुनमा धनुले भरिएको पिनाको डालो साट्दै भन्यो ।

भोलाले भोगाइको निष्कर्ष ओकल्यो, ‘‘हो यार । म जस्तो लाहुरे हुनुभन्दा तँ जस्तो तोरी लाहुरे नै ठिक ।’’

..............................................................................‍

..‍.‍.‍साथ सहयोगको खाँचो

लघुकथा संसार र कविता संसार अनलाइन मासिक पत्रिकालाई

जीवित राख्नका लागि तपाईंको 

आर्थिक सहयोग महत्वपूर्ण हुन्छ ।