लघुकथा (अङ्क १ मा प्रकाशित)

 आगोको लप्का

- रञ्जु मार्ग
अमेरिका 

 'ए बाबु ! जा जा, पल्लो घरमा मोही पारेका छन् क्यारे, मागेर लिएर आइजो ।' अगेनोमा ढिँडो ओराल्दै गरेकी ठकुर्नी आफ्नो दश वर्षीय छोरालाई अह्राउँछे ।

आँगनमा खेल्दै गरेको छोरा आमाको आदेश भुईंमा खस्न नपाउँदै फुरुङ्ग हुँदै भाँडो समातेर पल्लो घरतिर लाग्छ ।

केही बेर मै छोरा आइपुग्छ र आमाको अगाडि भाँडो फ्यात्त राखिदिँदै भन्छ – आमा ! आमा आज मोही पारेका छैनन् रे !

‘के भन्छ यो?‘ अगेनाबाट पाकेको ढिँडो निकाल्दै सोध्छे ।

‘हिजो साँझ तेरो बा’लाई भेट्दा त आज मोही पार्छौ भनेका थिए रे त !’
‘खोइ ? छैन भने । अँ साँच्ची ! हिजो बेलुका हाम्रा बा गएका थिए रे । अनि बेलुका भैंसीले दूध दिएन रे । उनीहरुले भन्दै थिए – ‘भैसीलाई चोखे लाग्यो रे ।

आमा ! आमा ! चोखे लागेको भनेको के हो ? अनि हाम्रा बा गएपछि किन चोखे लागेको?’

त्यो अबोध छोराको कौतुहलता ठकुर्निलाई अगेनामा बलिरहेको आगोको लप्का जस्तो  लाग्छ ।