लघुकथा (अङ्क १ मा प्रकाशित)

नयाँ वर्ष

-गंगा खड्का
बुढानीलकण्ठ, काठमाडौँ

"बाबा ! भोलि नयाँ वर्षमा घुम्न जाने त भनियो । तर टमीलाई कसको जिम्मा लाएर जाने होला ? कसले खानेकुरा खान दिन्छ त्यसलाई ? घरमा एक्लै बस्न त बोर हुन्छ नि त्यसलाई !"

“टमीको चिन्ता नगर न बाबु । ऊ त हाम्रो घरको सदस्य नै भइहाल्यो नि । ऊ पनि हामीसँगै जान्छ ।" रमिलाले नाति र छोराबिचको वार्तालाप सुनिन् ।
“यसपटक त हजुरआमालाई नि लाने होइन र बाबा ? हामी सबै गएपछि उहाँ घरमा एक्लै हुनुहुन्छ ।“ सानी नातिनीले प्रस्ताव राखी ।

कुकुरलाई पनि लिएर जाने निर्णय र नातिनीको प्रस्तावले रमिलाको अनुहारमा आशाको जून लाग्यो ।

“हजुरआमालाई लगेर घाँडो मात्रै । रमाइलो गर्न छोडेर एक दिन हिँडेको ठाउँमा नि को बस्छ हजुरआमाको गोठालो ?"
एक्कासि बुहारी कर्कशा स्वरमा बोली ।

बुहारीका वचन सुनेपछि अर्ध शरीर पक्षघात भएर थला परेकी रमिलाको आँसुको मूल फुट्यो ।

उनको पक्षमा वकालत गर्दै नातिनीले भनी, “नयाँ ठाउँमा घुम्न जाँदैमा नयाँ वर्ष विशेष हुँदैन । आफ्नै घरका भगवान्रुपी बुबाआमालाई माया र सम्मान गर्ने सोचमा परिवर्तन ल्याउन सके मात्रै नयाँ वर्ष खास हुन्छ ममी ।"