लघुकथा (अङ्क २ मा प्रकाशित)

ताली
-गंगा खड्का
बूढानिलकण्ठ, काठमाडौँ 

"छोरा होस् त सौरभ जस्तो !" कसैले भन्दै थिए ।
"छोराछोरी असल भए भने त बाबुआमालाई कति आनन्दआनन्द !"
"सौरभजस्तो छोरा पाउन त सात जुनी तपस्या गर्नुपर्छ ।"
"युवाले ल्याएको नयाँ योजना र सोचलाई हामीले खुलेर स्वागत गर्नुपर्छ ।"
एकातिर देश छोड्न नि परेन, अर्कातिर सङ्घर्षले कमाएको धनको सदुपयोग नि भयो । सौरभले खोलेको नयाँ अफिसको उद्घाटनको दिनमा आमन्त्रित व्यक्तिहरुले यसरी नै उसको प्रशंसा मुक्तकण्ठले गरे । सबैको कुरा सुनेर सौरभका बाबु हर्षले गदगद भए । उनी मनमनै आफ्नो भाग्यको तारिफ गर्दै थिए । त्यति नै बेला सौरभले बाबुको छेउमा गएर भन्यो, "देख्नुभयो बुबा ! विदेश नगएर मैले राम्रै त गरेछु नि । त्यहाँ सिकेको सीप र अनुभवले आज मलाई यो उचाइमा पु-यायो । हेर्नुस् न, हिजोसम्म कुरा काट्नेहरु आजदेखि मेरो लागि ताली बजाउँदै छन् ।"