मनको बह पोख्न अतीतमा समयको करौंतीले चिरेर घायल बनाएको हृदयलाई केही राहतका मलहम लगाउनका लागि साथै आफूले देखेका सुनेका सामाजिक, आर्थिक, राजनीतिक एवं पर्यावरणमा देखिएका परिवर्तन तथा विकृति औँल्याउन म लेख्छु ।
मनको सागरमा उर्लेर आएका भावनाका लहरहरू पुस्तकमा कैद गर्न । मनको पँधेरीमा भरेर पोखेका भाव नयनबाट थोपा थोपा भइ झरेका आँसुलाई साहित्यिक रूप दिई बटुली सम्भाली राख्न । समष्टि रूपमा अन्तरहृदयका भावहरूलाई व्यक्त गरी आत्मसन्तुष्टिका खुराक स्वरूप जगेर्ना गर्न म लेख्छु ।
नेपाली, नेपालभाषा एवं विभिन्न भाषा भाषिक साहित्य सागरमा केही साहित्यिक बुँदाहरू थप्ने सानो प्रयास साथै साहित्य नै वास्तविक देशको एक किसिमको समसामयिक वस्तुस्थिति झल्काउने ऐना हो । अतः साहित्यको माध्यमबाट दर्शाउन एवं आउने भावी पुस्ताका लागि भएपनि साहित्यिक रचनाहरूद्वारा विगत समाजका वस्तुस्थिति बोध गराउने र सामाजिक सांस्कृतिक एवं राजनीतिक झलकहरू दर्शाइ साहित्यिक रूपमा जगेर्ना गरिराख्न म लेख्छु ।
यस्तैगरि साहित्यिक जगतमा प्रवेश गर्न चालेका मेरा कदमले आफ्नो पनि साहित्यिक जगतमा नाम दर्ता गर्ने एक किसिमको प्रयास पनि हो । वास्तविक रूपमा साहित्य मेरो निम्ति अलौकिक साहित्य संसारको गहिराइमा हराई मनको शान्तिको असीम आनन्द लिने माध्यम वा स्थल पनि हो ।
कहिलेकाहीँ आफूले भन्न र व्यक्त गर्न नसकेका हृदयका भावनाहरू प्रदर्शन गर्ने प्रदर्शनस्थलजस्तै लाग्छ साहित्य चौतारी तसर्थ भावहरू प्रदर्शन गर्न पनि लेख्छु ।
जीवित राख्नका लागि तपाईंको
आर्थिक सहयोग महत्वपूर्ण हुन्छ ।
No comments:
Post a Comment