भृकुटीमण्डपमा राजावादीको आन्दोलन सुरु भयो ।
“बाजे ! राजतन्त्र र गणतन्त्रमा कुन छान्नुहुन्छ ?” रिमोट खेलाउँदै टिभी कोठामा नातिले हर्कबहादुरलाई हठात् सोध्यो ।
“गणतन्त्र ।” आन्दोलनको दृश्यमा एकोहोरिएका हर्कबहादुरले आँखा नघुमाई नातिलाई जवाफ फर्कायो । र, प्रतिप्रश्न पनि तेर्सायो, “तँलाई नि कुन मन पर्छ ?”
“खै ! कुन मन पर्छ, भनुँ ! राजतन्त्र कस्तो थियो ? देखेको भए पो ।”
“एकचोटि दुवै हातले क्रस गरेर दुवैपट्टीको कान समात । थोरै निहुर ।” बाजेले नातिलाई राजतन्त्र व्यवस्थाको महसुस दिलाउने प्रयास गर्यो ।
“हैन, हैन । थचक्क तलै बस्ने हैन, हौ ।”
“सिधा उभिन पनि नपाउनु अनि तल थ्याच्च पनि नबस्नु । यो त गाह्रो हुन्छ, बाजे ।”
“यही पोजिशनमा एकछिन उभ न ।”
“ऐय्या ! गाह्रो भो ।”
“लु, अब खटियामा तिम्रो खुसीले बस ।”
खुसी हुँदै नाति खटिया चढ्यो ।
हर्कबहादुरले नातिलाई स्पष्ट पार्यो, “सम्झ, अघिको पोजिशन राजतन्त्र र अहिलेको गणतन्त्र ।”
– हतुवागढी –६, होम्ताङ्, भोजपुर हालः जापान
जीवित राख्नका लागि तपाईंको
आर्थिक सहयोग महत्वपूर्ण हुन्छ ।
No comments:
Post a Comment