तँ कसरी मरिस् ?
मृत्युको सहि र तथ्य कारण पत्ता लगाउने डाक्टरको रुपमा ख्याती कमाएका पोष्ट मार्टम विज्ञ डा. दयानन्द सेतो पहिरनमा विभिन्न औजारहरू हातमा लिएर सोध्दै थिए । भनिन्छ, उनी लाससँग कुरा पनि गर्न सक्थे ।
“जेब्राक्रसमा बाटो काट्न लागेको थिएँ, अचानक एउटा बेग रफ्तारमा आएको कारको ठक्करले उछिट्यायो ।’’ लास बोल्यो ।
“किन बाटो काट्न लागेको ?’’ डाक्टरले बाटो काट्नु पछाडिको गुह्य पत्ता लगाउने जमर्को गरे ।
“सधैँ यसरी नै रोजगारीका लागी साहुकोमा चाहार्थे । अगाडिको साहुलाई श्रमिकको आवश्यकता छ रे भनेको सुनेको थिएँ । छिट्टै पुगे पाइन्थ्यो कि भन्ने आश थियो ।’’
“अब के चाहन्छस् त ?’’ डाक्टरले उसको मृत्यु पछिको धारणा बुझ्न चाहे ।
“गाडी चालकलाई दण्ड भएको सुन्न चाहान्छु । यति भए आत्माले शान्ति पाउने छ ।’’
“तँ अर्को दुस्साहस गर्दैछस् ।’’ डाक्टर साहेबले हतारो प्रति व्यङ्ग्य गर्दै भने ।
“के ?’’ लासले प्रश्न गर्यो ।
डाक्टर साहेबले खुईय्य गर्दै भने, “यहाँ मन्त्रीको छोरालाई दण्डको अपेक्षा ।’’
- लोकन्थली, भक्तपुर
जीवित राख्नका लागि तपाईंको
आर्थिक सहयोग महत्वपूर्ण हुन्छ ।
No comments:
Post a Comment