लघुकथा (अङ्क ३ मा प्रकाशित)

समस्या

-लता के.सी.
तिनकुने, काठमाडौँ

"के गरौँ त ? कमाइ छाडेर स्वदेश फर्कौँ ?’’  
खुइय...! लामो सास फेरेर बिरामी आमाले भन्नुभयो, ‘‘तेरो परिवार सबै बिल्लीबाठ हुन्छ छोरा !  म त यसै पनि डाँडापारिको जून !  तँ यता फर्केर के पो गर्लास् ?’’

उसले श्रीमतीसँग सल्लाह माग्यो, ‘‘तिमी घरै फर्क । म खर्च धान्नेछु ।’’
‘‘म एक्लै कसरी आमालाई स्याहार्नु र ? बरु राम्रो वृद्धाश्रममा राखौँ न, हुन्न ?’’ श्रीमतीले भनिन् । त्यसपछि साथीको आश्रममा नै आमाको व्यवस्था मिलायो ।

एकदिन आमाले भन्नुभयो, ‘‘सबै नेपालीलाई अमेरिका मनपर्ने अनि अमेरिकालाई नेपाल मनपर्ने रहेछ है बाबु ?’’

‘‘नेपालमा त हामीजस्ता नपढेका बकम्फुसे मात्र बस्ने देश भयो, आमा !’’
आमाले भन्नुभयो, ‘‘तिमीहरु यहाँ बसेर आन्दोलन गर्न सक्दैनौँ ?’’
‘‘कस्तो आन्दोलन आमा ?’’

उज्यालो अनुहार बनाएर आमाले भन्नुभयो, ‘‘अमेरिका–नेपाल भिषा फ्रीको ।’’