संयोग
रञ्जुश्री पराजुली
हालः अमेरिका
घरको ढोकाबाहिर उभिरहेको देखेर सोधेँ, ‘कस्लाई खोजेको बाबू ?’
‘कसैलाई पनि होइन । जाडो भएर एकैछिन बसेको ।’ उसले उत्तर दियो ।
उस्को अनुहार मलिन थियो । असोज महिनाको बिहानीपख भएकाले अलि चिसो नै थियो । केटोले बाक्लो लुगा लगाएको थिएन । हाम्रा त्यत्रै एउटा छोरा थियो । मलाई त्यसको माया लाग्यो र भनेँ, ‘भित्र हिँड । म न्यानो लुगा दिन्छु । अनि केही खानेकुरा पनि दिन्छु ।’
उसले पहिले त मानेन । पछि डराउँदै भन्यो, ‘म चोर होइन । खराब केटा पनि होइन । यहाँ आँगनमा म जस्तै दाइहरू खेलेको देखेर हेर्न मात्र आएको ।’
भित्र लगेर न्यानो लुगा र तातो खाना दिएँ । भित्तामा टाँगिएका तस्बिरहरू ट्वाल्लपरेर हेर्दै उसले भन्यो, ‘यो कस्को तस्बिर ?’
“हाम्रो परिवारको ।’ मैले छोटो उत्तर दिएँ ।
‘यो सानो केटी तपाईंको नन्द हो ?’ उसले अनायास भन्यो ।
‘हो ।’ मैले सहमति जनाएँ ।
त्यसपछि ऊ केही बोलेन । तर बारम्बार भित्तामा झुन्ड्याएको तस्बिरतिर आँखा लगाइरह्यो । मलाई अचम्म लाग्यो । अनि सोधेँ, ‘तस्बिर किन हेरिरहेको ?’
‘तपाईंलाई म आमा भन्छु है ।’ उसले सोध्यो ।
मैले जिज्ञाशा राखेँ, ‘किन ?’
उसले भन्यो, ‘आमा भनेपछि मनको कुरा सबै भन्न मिल्छ नि । त्यसैले ।’
‘हुन्छ, मलाई आमा नै भन ।’ मैले अनुमति दिएँ ।
उसले फेरि भित्ताको तस्बिर हेर्यो । अँखाभरि आँसु टलपलायो । अनि भन्यो, ‘हजुरबुबाले हुन्नभन्दा भन्दै पनि मेरी आमा लाहुरेसँग मुग्लान पसेकी रे ! म मुग्लानमा नै जन्मिएको रे ! त्यसपछि माइतीले मुखै हेरेनन् रे ! बाआमालाई खोलाले बगाएर बेपत्ता पारेपछि म आफन्तहरूको खोजीमा नेपाल आएको । बेखर्ची भएर धेरै दुःख पाँए । आज हजुरले मलाई आमा जस्तै माया गर्नु भयो ।’
अनि तस्बिरमा भएकी केटीलाई औल्याउँदै भन्यो, ‘यिनै हुन् मेरी जन्म दिने आमा ।’
....साथ सहयोगको खाँचो
No comments:
Post a Comment