नाटक
ध्रुवराज थापा 'पुरुष'
काभ्रे, पनौती हालः कपन, काठमाडौँ
सुट टाई लगाएका सुकिला मान्छेहरू हलभित्र पसे । तारे होटलको सभाहल क्षणभर मै भरियो ।
हक अधिकारका कुरा भए । उनीहरूलाई माथि ल्याउने कुरा भयो । अधिकार बाँड्ने कुरा भए । पहुँच बढाउने बिचार बाँडियो । कार्यपत्र प्रस्तुत भयो । टिप्पणीकारले टिप्पणी गरे । दर्शकले ताली पड्काए । कसैले मोटा कसैले दुब्ला खाम बुझे । सबै प्रफुल्ल देखिए । कार्यक्रम सकियो । खानपान सुरू भयो । फिला र कवाफ मज्जाले चपाए । विदेशी ब्रान्डीको खोलो बग्यो ।
डोरीमा झुन्डिएर होटलको रङ्गरोगन गर्दै गरेका एक मजदुरले झ्यालबाट उक्त दृष्य देखे । भोक तिर्खाले प्याकप्याक परेका उनले घुटुक्क थुक निल्दै हावामा उड्दै गरेका आफ्ना साथीलाई देखाए, “उ हेर त, यहाँ त हाम्रै दिवस पो मनाएको रहेछ ।’’
....साथ सहयोगको खाँचो
No comments:
Post a Comment