"हे प्रभु…. हाम्रो पालो कहिले आउँछ होला…? हामी चाहीँ सधैँ अरुले दिएकै भरमा बाँच्नुपर्ने…?’’ खल्तीमार बडो दीनहीन भावमा गुप्तेश्वर महादेवको थुम्कोमा झुकेर गुनासो गर्दै थियो ।
“म आफै त भस्मासुरबाट लखेटिएर धर्तीमुनी, चुनढुङ्गाको थुम्कोभित्र लुकेर बस्नु परेको छ, तिम्रो निदान कसरी गरुँ…?’’ गुप्तेश्वरले क्षुब्ध भाषामा गुप्त कुरा बताए ।
“प्रभु हाम्रो आस्थाको धरोहरले नै लुकेर बस्नु परेपछि, हाम्रो भलो कसरी होला त ।’’ खल्तीमार झन क्षुब्ध हुँदै आफ्नो निराशा पोख्यो ।
“चिन्ता नगर, समय सबैको आउँछ, मंगोल युग, रोमन युग, सिकन्दर युग, पश्चिमा युग सबैको पालो आएर गैसक्यो, अहिले युनिपोलारको समय छ, अब बिस्तारै मल्टिपोलारको दिन आउँछ ।’’ गुप्तेश्वरको भविष्यवाणी ।
“प्रभु….! हामी खल्तीपोलारहरूको पनि दिन आउँछ त…?’’
“अवश्य आउँछ, तर भस्मासुरबाट चाहिँ बच्नुपर्छ ।’’
“अनि प्रभु यो भस्मासुरको कुनै निदान छैन त ।’’
“हुँदैछ… ! क्षीरसागरमा योजना बन्दै छ, चाँडै मोहिनीको आगमन हुँदैछ । भस्मासुरलाई आफ्नै दम्भले भस्म हुन्छ ।’’
“अनि प्रभु ! हामीजस्ता भासेभुसेहरूको पनि दिन आउँछ त साँच्चै…?’’
“किन न आउनू… ! जन्मिँदा सबै भासेभुसे नै हुन्छन्, अनि पछि हट्टाकट्टा हुन्छ, अनि फेरि खुइले बुढा हुन्छन्, अनि खुस्किन्छन् । चक्र चलिरहन्छ नि ।’’
“प्रभु…. ! मेरो उद्वार गर्नुस्, मेरो रक्षा गर्नुस्…. !’’ एउटी अबलाको प्रवेश
“के भयो तिमीलाई भन देवी ।’’ गुप्तेश्वरले सोधे ।
“मेरो लोग्ने बहुलाइ सक्यो, मलाई सधैँ कुट्पिट गर्छ, मेरो इच्छा विपरित करणी गर्छ ।’’
“लोग्ने स्वास्नीको यस्तो झगडा अचेल राष्ट्र संघले हेर्ने गर्छ, उतै गएर उजुरी गर ।’’
- बेलबारी –३, मोरङ्ग
जीवित राख्नका लागि तपाईंको
आर्थिक सहयोग महत्वपूर्ण हुन्छ ।
No comments:
Post a Comment