एक हुल मानिसहरू गैंटी, कोदालो, साबेल, घन बोकेर जाँदै थिए । यो कस्तो किसिमको जुलुस हो भन्दै देख्नेहरू छक्क परे ।
रमिते मध्येकै एकले प्वाक्क सोध्यो– “टायर बाल्ने, ढुङ्गा हान्ने जुलुस देखेका थियौं, यस्तो जुलुस त पहिलो पटक देख्दैछौं के हो यो ?”
हुलका मध्येकै एकले बोल्यो– “राष्ट्रिय क्रिकेट खेलाडीको घर भत्काउन हिंडेको ! त्यस्तो कमजोर टिमसँग पनि हार्ने ? जिताउन नसक्नेले के खेल्नु ?” भन्दै फटाफट अघि बढ्यो ।
त्यसको एक वर्षपछि राष्ट्रिय क्रिकेट टिमले प्रगति गर्दै डिभिजन–१ मा उक्लियो र विश्वकप खेल्ने हकदार बन्यो ।
उसैगरी एक हुल मानिसहरू कोदालो, गैंटी, साबेल, घन बोकेका सडकमा जुलुस देखियो । फेरि देख्ने मानिसहरू छक्क परे ।
एक जनाले खसखस लागेर सोध्यो– पोहोर पनि यस्तो जुलुस निस्केको थियो । के हो यो भन्दा ? क्रिकेट खेलाडीको घर भत्काउन जान लागेको भन्थे । यसपाली चाहिँ यो के हो नि ?”
हुलमध्ये एकले बोल्यो– “त्यही पोहोर भत्काएको घर बनाउन हिँडेको !” बनाउन पर्ने त्यस्तो के बाध्यता थियो र भनी प्रतिप्रश्न गर्दा ऊ अझ फूर्तिसाथ बोल्यो– “ल यसपटक त हाम्रो क्रिकेट टिमले विश्वकप खेल्ने भयो नि !”
त्यसपछि त्यो जुलुस विस्तारै ओझेल पर्दै गयो ।
- गोरखा, हालः काठमाडौँ
जीवित राख्नका लागि तपाईंको
आर्थिक सहयोग महत्वपूर्ण हुन्छ ।
No comments:
Post a Comment