बज्यो धून बज्यो धून पक्कै कृष्ण हुन्
भन्ने गीतमा खल्तीमा बज्यो फोनको धून । त्यसपछि उनले खल्तीबाट मोबाईल निकालेर कसले बजायो भनेर हेरे अनि बोले – हजुर ! नमस्कार, म बोल्दैछु । अस्तिको खेपको पैसो पाउनुभो ? ए ! ल ठिक छ त्यसोभए । अँ सुन्नुस् न हजुर एउटा अर्कोपनि त्यो अस्ति गिट्टी बालुवा छड सिमेन्ट पठाइदिनुभएको जस्तै ठाउँ छ । त्यहाँ पनि त्यसैगरी सामन पठाइदिनुपर्यो । मै तपाईंलाई फोन गरुँला भन्दै थिएँ, तपाईंकै फोन आयो । एकदम सुसाइतमै फोन गर्नुभो । बरू बिला बनाउँदा चाहिँ अल्लि भिन्दै तरिकाले बनाउनुहोला । त्यो सामानको मात्र होइन यस्सो कोही बेला तपाईं हामी कतै भेट हुँदा एक दुई घण्टा बसेर रमाइलो गर्न समेत निस्कने गरी । मैलेपनि त्यही बिल देखाएर अधिकृतहरूबाट पैसो झार्नु पर्छ । फेरि जति किस्ता पैसो निकाल्यो त्यतिनै पटक त्यहिँ कार्यालय भित्र अघोषित पट्के कर नदिए काम अड्काइहाल्छन । अनि यस्सो बाङ्गो औंलो त बनाउनै पर्यो ।
हवस् हजुर हवस् । तपाईं त्यति ज्ञानी मिलनसार हुनुहुन्छ भनेरै बुझेरै हामीले कारोबार तपाईंसित गरेका हौं नि ! ल हजुर, तपाईंको त्यति पक्का वचन सुनियो । म अब एकदम लाभदायक कारोबार हुने भो । बरू पैसोचाहिँ एकहप्तापछि अर्को किस्ता निस्केपछि है त हजुर !
हवस् हवस् । हुन्छ हुन्छ भैहाल्छ नि ! तपाईं व्यापारी र हामी ठेकदार भनेको त ढुङ्गाको भर माटो र माटोको भर ढुङ्गा त हो नि । दोहोरै हित त हेर्नू परिगो नि । हवस् म ढुक्क भएँ है हजुर । मेरो अहिले भर्खरै अर्को एउटा यस्तै कामको लागि बैठक छ । अहिलेलाई मैले फोन राखें है । नमस्कार ।
यो सम्वाद सुनिरहेको एकजना कामदारले ठेकदार मोटरसाइकल चलाएर अल्लि पर पुगेपछि अर्को कामदारसँग भन्यो – साले ! ठेकदार हुँ भन्ने अनि देश र जनतालाई सेकाउनसम्म सेकाउने सेकदार बन्ने ? कस्तो भ्रष्ट रहेछ यार हाम्रो साहू त । यस्ता देशमाराको नोकर बन्दा हाम्रो इज्जत नै जान्छ । बरू हिँड तँ र म अन्तै अल्लि इज्जतिलो ठाउँ खोज्न जाउँ ! हाम्रै पसिनाको करबाट आउने बजेटमा पौडी खेल्नेहरूलाई सहयोग गर्नु अपराध हो । सेकदार जस्तो भए नि हाम्रो त इज्जत छ नि । हामी अपराधीको नोकर नबसौं ।
नजिकै बसेर कुरो सुनिरहेको खैरे कुकुर पनि एकछिन पछि मान्छेको कुरा बुझेकै जस्तोगरी कुम्लोकुटुरो बोकेर बाटो लागेका कामदारहरूकै पछि पछि गयो ।
- चितवन
No comments:
Post a Comment